رولز الجبنة

رولز الجبنة

ندخل على المقدير
بسم الله

2 كوب دقيق ( استخدمت الدقيق الكويتى )
2 معلقة كبيرة زيت زيتون
2 معلقة كبيرة لبن بودرة
2 معلقة صغيرة خميرة فورية
نص معلقة صغيرة بس مليانة بيكينج باودر
ربع معلقة ملح
معلقة صغيرة سكر
كوب ماء ( ممكن أقل او اكتر حسب نوع الدقيق ) ( انا اخدت اقل من الكوباية اللى فى الصورة دى ماحتجتش كل الماية دى )

هنحط كل المقادير الجافة مع بعض و نقلبهم ( يعنى بدون الزيت و الماية )

و بعدين نحط عليهم الزيت و نخلط

و بعدين نضيف الماية شوية شوية ( ماتضيفيش كل الماية مرة واحدة عشان ممكن يكون الدقيق اللى بتستخدميه مش محتاج كل كمية الماية دى )
انا عن نفسى بستخدم الدقيق الكويتى و ماستخدمتش كل كمية الماية اللى كانت فى الكوباية دى اتبقى شويه بس للأسف مصورتش اللى اتبقى

طيب تعرفى منين ان كدهه كفاية ماية ؟؟
يبقى كفاية ماية لما تبقى العجينة عاملة كده زى الصورة دى ( هتلاقيها لمت معاكى بس لسه بتلزق جامد )
رشى الرخامة او الترابيزة بالدقيق و حطيها عليه ( مش هتشرب دقيق ياما خلى بالك اوعى تحطيلها دقيق كتير هتنشف و تبوظ )

و ابدأى عجن فيها هتلاقيها لمت كويس معاكى بس لسه بتلزق زى كده لما تيجى تفرديها ( ممكن تبلى ايديك بنقطة زيت و انتى بتعجنيها لو بتلزق جامد اوى )

انما لما تيجى تلفيها فى ايدك ماتلاقيهاش بتلزق زى كده

و حتى الرخامة مش هتلاقى عليها حاجة لازقة كده

سيبيها تخمر بقى ساعتين و ماتستعجليش عليها ( انا مرة كنت مستعجلة و ولعت الفرن و سخنته و طفيته و حطيت جواه العجينة فى بولة و غطيتها و سيبتها خمرت فى نص ساعة بس لما باسيبها تخمر براحتها بتبقى أحسن )

هنا حطيتها فى البولة اللى كنت بعجنها فيها الأول

هنا خمرت

نرش شوية دقيق و نحط العجينة عشان نفردها كده

و نفردها

نجيب الجبنة اللى هنحشي بيها
اللى هية :
حبة البركة
جبنة بيضاء فيتا
جبنة موتزريلا
و blue cheese
او جبنة ريكفورد و دى اهم واحدة فيهم ( حتى لو مش بتحبيها دى بتدى نكهة مش معقولة رهيبة فعلا انا جوزى مش ممكن ياكل الجبنة دى بس فى الرولز دى بياكلها عادى ما شاء الله و بيحبها جدا جدا) و بعدين احنا هنكه بيها يعنى هنبشر حته صغيرة على العجينة تدى نكهة مش أكتر ( انا طبعا ما استخدمتش كل الجبنة دى استخدمت جزء بس )

هنحط شوية من الموتزريلا و بعدين الجبنة البيضاء و بعدين نبشر الجبنة الريكفورد و نحط حبة البركة و بعدين نرجع نحط موتزريلا تانى عشان حبة البركة تبقى متغلفة بالجبنة

ونبدأ نلف الرول

كده لفيته اقفلى الأطراف ( ممكن تبلى صوابعك بماية و تقفلى العجينة من الأطراف )

و قطعيها كانك بتفطعى السينابون

و حطيتها فى صينية مفروشة بورق زبدة ( ممكن تحطيها فى صينية مدهونة زيت و مرشوشة دقيق )

فيه مرة حشيتها باللحمة المفرومة و حطيت عليها طماطم و فلفل متقطعين كده ( طلعت جميلة برضه )

 

و حطيتها فى صينية المافن بس رشيتها الأول بزيت و دقيق

و هنا لما اللى باللحمة طلعت رشيت شوية موتزريلا و دخلتها الفرن تانى الجبنة ساحت و طلعتها على طول

و دى بقى اللى بالجبنة

و دى من جوه هشة و طرية جدا جدا

انتى ممكن تحشيها بأى حاجة ممكن كمان حشوة البيتزا كتغيير برضه
بس بجد جربوها بالجبنة دى هتعحبكوا اوى ان شاء الله

تشيكن رولز

(تشيكن رووووووول)

المقادير :


فراخ بانيه عدد 6 قطع (حسب الرغبة)

زعتر + ملح + فلفل اسود

بودرة بصل (حسب الرغبة)

ثوم مفروم (مهم جدا)

دقيق + لبن مع بيض + بقسماط

جبنة شيدر مدخنة (خلي الراجل يدهالك من غير ميقطعها)

جبنة موزيرلا (حسب الرغبة)

لانشون فراخ مدخن (او حسب الرغبة)

تمسكي قطعة الفراخ البانية وعليها من فوق كيس بلاستك عشان لما تدقيها متتقطعش منك
وقبل مدقيها لو تخينة فتحيها واكيد انتو عارفين ازاي تتفتح

هتبقى بالمنظر ده

وبعدين تقومي جايبة الفراخ وشة فلفل اسود مع ملح مع زعتر وادهني بيها من فوق ومن تحت

وبعدين تقطعي الانشون ثلاث بالشكل ده

والجبنة الشيدر كمان كده وحاول لو الفراخ البانيه مش عيضة متقطعهاش تخينة عشان تعرفي تلفيها

وبعدين تحطيها بالمنظر ده وتلفي الفراخ وده مهم جدا بالطول مش العرض عشان تقى مطولة معاكي

وهتبقى بالمنظر ده

وعلى طول حطيها في الفريزير ربع ساعة عشان تبقى نص متجمدة
ومتفتحش منك

وبعدين تجبيها الاول تحطيها في الدقيق وبعدين اللبن والبيض وبعدين البقسماط

وحاولي وانتي بتحطيها في البقسماط تتكي عليها شوية عشان تقفل اكتر

وبعدين هتحمريها في زيت غزير ومغلي جدا وحطيها براحة واول لما تحطيها تخلي النار مش حامية متوسطة عشان تستوي من بة ومن جوة

بصي انا اقطعتها ازاي بقت عاملة ازاي من جوة وكفاية الطعم